Wika at Teknolohiya: Persepsyon sa Paggamit ng Artificial Intelligence sa Akademikong Pagsulat

Ang kakulangan at kawalan ng interes sa wastong paggamit ng gramatika sa wikang Filipino ay nananatiling isang pangunahing suliranin sa larangan ng edukasyon sa kasalukuyan. Upang masusing maunawaan ang isyung ito, gumamit ako ng kwalitatibong deskriptibong disenyo sa aking pananaliksik. Pinili ko ang sampung (10) mag-aaral bilang mga kalahok sa pamamagitan ng snowball sampling technique, kung saan tinukoy ng mga unang kalahok ang iba pa nilang kamag-aral na makapagbibigay ng makabuluhang impormasyon tungkol sa kanilang aktuwal na karanasan sa paggamit ng gramatika. Sa pamamagitan ng malalim na panayam at focus group discussion (FGD), natuklasan ko na ang mga mag-aaral ay nahihirapang gamitin ang tamang gramatika sa kanilang mga akademikong sulatin dahil hindi nila ito naiaangkop sa pang-araw-araw na komunikasyon. Madalas silang gumamit ng balbal, pinaikling salita, at maging ng "Jeje" o tekstong estilo na labis na nakakaapekto sa kanilang pormal na pagsulat. Dahil dito, nagiging mahina ang kanilang kakayahan sa pagbuo ng wastong pangungusap, paggamit ng angkop na bantas, at pagpapahayag ng malinaw na kaisipan sa Filipino. Higit pa rito, ipinapaliwanag ng pag-aaral na ito kung paano tinatanggap ng mga mag-aaral ang mga makabagong teknolohiya, partikular na ang artificial intelligence (AI), at ang epekto nito sa kanilang pagkatuto at paggamit ng gramatika. Sa hinaharap, iminumungkahing gamitin ang Multiple Linear Regression upang masukat ang ugnayan ng iba't ibang salik—gaya ng impluwensya ng social media, dalas ng paggamit ng AI, at antas ng interes—sa kawalan ng wastong gramatika. Gayundin, iminumungkahi ang Exploratory Factor Analysis upang matukoy ang mga pinagbabatayang dahilan ng suliranin. Sa pamamagitan ng mga pamamaraang ito, inaasahang mapapaunlad ang umiiral na modelo at mabibigyang-lunas ang mga karanasan ng mga mag-aaral sa paggamit ng AI sa pagsulat ng akademikong sulatin, nang hindi nalilimutan ang kahalagahan ng wastong gramatika sa pagpapayabong ng wikang Filipino.